Daly Valet : Komisyon deblozay !

1
478

Mercredi 9 octobre 2019 ((rezonodwes.com))– Sanble se tout bon Jovenel Moise, Evans Paul alias K.P, Gary Bodeau konvenk tèt yo yo se Ayisyen ki pi eklere e pi entèlijan nan politik nan peyi a. Donk yo ka bwè tout moun e fè tout moun pran kaka poul pou jòn ze. Adye !

Franchman ak dènye Komisyon deblozay sa Jovenel ak K.P kwè vrèman ak pawòl move mannèv woule m 2 bò yo ka woule peyi a nan farin. Komisyon sa se jis yon pwovokasyon anplis. Epi gade moun ki ladan yo : yo tout se Tèt Kale ofisyèl ak anba chal. Donk Komisyon sa se pito yon ekip foutbòl Tèt kale Woz ki deside kanpe anfas pèp la ak pou objektif fè dilatwa, genyen pèp la nan fatig pwologasyon ak gòl ak men. Ak nouvo ekip foutbòl woz koken je chèch sa menm VAR ka pran nan pa konprann.

Kòm si, tolerans Evans Paul ap preche a se pou mennen peyi a tolere pouvwa sinik, pa itil, enkapab ak destriktè sa ? Kidonk Viv Ansanm lan vle di se pou peyi a viv ak pouvwa lòbèy sa k ap matirize tout yon pèp ?

Pou yon ekip neg ak fanm kreye kriz yo, mete gaz nan motè kriz la chak jou, touye pitit pèp la chak jou, dekonstonbre ekonomi peyi a, afame pèp la chak jou pi plis ki livre nan malsite, gache avni timoun nan peyi a, alòs pou se menm moun sa yo ki vin oze prezante tèt yo tankou Komisyon k ap vin rezoud kriz yo kreye a ? Franchman ant je chèch ak je chèch, moun sa yo montre yo gen plis ke doktora nan je chèch ak fè seyans lòbèy ilegal.

Lè m t ap grandi timoun nan Jeremie te gen yon moun fou ki te rele Sanwont. Tankou anpil lòt timoun mwen te konn anmède misye nan lari a. Li toujou abitye an nwa. Chak jou li vire won nan vil la. Li te gen yon sèl fraz nan bouch li chak kote li pase :  » Ou pa te kwè…Sanwont ! « 

Ak dènye Komisyon deblozay sa, se tankou yon ekip « Sanwont Pa Te Kwè » ki pran tout peyi a, tout pèp la pou yon bann « Sanwont Pa Te Kwè  » menm jan ak yo.

Kom se sou bit pwovokasyon an pèmanans pouvwa sa kanpe ak peyi a e ak pèp la, an nou swiv ki kote dènye Komisyon pwovokasyon sa ap mennen. Sèl sa m konnen, peyi a, pèp la pa deside tolere ni viv ansanm ak pouvwa sinik « Sanwont Pa Te Kwè » sa.

Daly Valet
9 Oktòb 2019

1 COMMENT

LEAVE A REPLY

Please enter your comment!
Please enter your name here

Ce site utilise Akismet pour réduire les indésirables. En savoir plus sur comment les données de vos commentaires sont utilisées.