Mouvman Konekte-Ayiti di li pa nan referandòm ni eleksyon ak pouvwa kòwonpi ilegal

NÒT POU LAPRÈS

Pòtoprens  Lendi  19  Avril  2021 ((rezonodwes.com))–  MOUVMAN  KONEKTE-AYITI  ap  leve  vwa  l  pou l  rele  sekou kont  tout zak  latwoublay k  ap  pase  nan  peyi  a  depi  kèk tan.  Sitiyasyon  sa  vin  pi  mal  dènye  jou  sa  yo,  men  Leta pa  voum  li  pa  pwèt.  Pami  zak  sa  yo,  n  ap  site  : 

• 142  zak  kidnapin  ki  anrajistre  pou twa  premye  mwa  ane  2021  an  ; 
• 4  polisye  bandi  sasinen  anndan  Village  de  Dieu  jou  kit  e  12  Mas  2021  an,  nan  kad  yon operasyon  mal  planifye  ; 
• 1  polisye  k  ap  mande  pi  bon  kondisyon  travay  jwenn  arestasyon  l  devan  lakay li,  jou  ki  te  27 Mas  2021  an,  pandan  bandi  ap  sikile  libe-libè  ; 
• 13  moun mouri ak  22  kay  boule  anndan  katye  Bèlè  nan  dat  13  Mas  pase  a  ;  zak  sa  a  pote siyati  gwoup  gang  G9  ; 
• 7  relijye  viktim  kidnapin  anba  men malfra  san  limit,  jounen  12  Avril  ki  sot  pase. 

San  nou pa  di  plis,  n  ap  sèlman  siyale  yon  bann  lòt  zak  sasinay ak  kidnapin  ki  kontinye  fèt  anba  je  Leta; 
Lè  n  konsidere  tout  dezòd  say o  k  ap  pase  nan  peyi  a  akoz  absans  volonte  rejim  anplas  la  pou kreye bon kondisyon  lavi; Lè  n  konsidere  rapò  rejim  sila  ak  plizyè  gwoup  bandi  anndan  peyi  a; 
Lè  n  konsidere  manda  Jovenel  Moïse    fini  depi  7  Fevriye  2021  an,  dapre  atik  134-2  Konstitisyon  an,  ak atik  239  lwa  elektoral  2015  lan,  MKA  ap  raple  epi  ranfòse  pozisyon  nou ki  se  pozisyon pèp  la  ki  di: 
– Nou pa nan referandòm  ak  yon  pouvwa kòwonpi  jouk  nan  zo,  ki  ap  fè  tout  sa  l  kapab  pou  l pou reponn  kesyon  lajistis  pou dilapidasyon  lajan  Petwokaribe  key  o  gaspiye;  ak  tout  lòt  deriv ki  fèt sou  rejim  PHTK  a  pandan  10  lane; 
– Nou pa nan eleksyon  ak  yon  pouvwa  ilegal,  kote  sèl  sousi  yo  se  kenbe  pouvwa  a  koutkekout. 

Sou  baz  konsiderasyon  sa  yo,  MOUVMAN  KONEKTE-AYITI  (MKA)  ap  mande  popilasyon  an,  tout regwoupman  ak pati  politik  yo  ak  sosyete  sivil la,  kontinye  goumen  pou  respè  dwa  nou  kòm  pèp;  pou lòd  demokratik  table  pou  tout  bon anndfan  peyi,  epi  pou  NOU  rive  konstui  yon  sosyete  pwospè, solidè,  kote  Leta  ap  kreye  kondisyon  byennèt pou  tout  moun. 

MKA  ap  fini  ak  pawòl  sa  ki  gen  plas  nan  kontèks  opresyon anndan  kou deyò  nasyon  an  an  ap  viv  jodi a:  
«  Se pou  nou  sèmante  pou  nou  goumen  jouk  dènye  souf  nou  pou  endepandans  peyi  a.  »   

Allwitch  JOLY                                                                                             
Kòdonatè  Jeneral 
                                                                                       
Antoine  Joseph  CHERY
Responsab  Mobilizasyon