Pouki
M pa kwè Toujou
tankou m te gen senkan
Tonton Nwèl se papa m
lakay pral jwenn kado
Pouki
M pa kwè toujou
tankou m te gen dizan
frè ak sè se siman
je pran kou
nen kouri dlo
Pouki
M pa kwè toujou
tankou m te gen sèzan
promès ak dèt
se marasa
menm plim ak plimay
Pouki
M vle kwè toujou
tankou m te gen ventan
zam dwe met ba
pou papye triyonfe
Pasesit
Pasela
Dlo nan je ak foli
lonje sou menm nat
Aloufa ak bandi
tifle sou menm tab
Tiflè
boujonnen
Lavi deperi
Babye poul, babye mayi
Bab mayi fennen
Ayè se baboukèt
jodi
se pawòl van
pawòl tafya
pawòl bouch sal
Dezespwa tout lannwit
Malsite jouk li jou
Lamizè toutjounen
M pa vle kwè
M pa vle wè
Jodi vle demen
avantyè
vle tan kolon
Esklav lontan
Restavèk jodi
Menmman
Parèyman
Jodi se goumen,
demen son lòt jou
tou nèf
Dan Yoo
