AVRI-LI-SAN
Ala peyi gen blofè
Yon ansyen tòsyonè
Yon ansyen diktatè
Yon kanson fè
Yon sanginè
Pèp souveren te bay kanè
Ki te konprann li te syèl e tè
Nan fè lavi zòt tounen lanfè
Matirize, tòtire, voye moun nan simityè
Se li yo wè ki merite lonè
Se li yo twouve ki merite respè
Se li yo chwazi kòm envite donè
Se devan pye l yo chwazi jete flè
Ala moun yo flatè
Ala moun yo manke wotè
Si lawont te pou vann anba kay fè
Zòt ta dwe al achte yon ti lòsyè
Ala moun yo pa gen grandè
Adje, entelektyèl peyi n tounen vè
Ki gen feblès pou move lòdè
Yo blayi kò yo nan nenpòt matyè
Yo aji kòm yon pil san pidè
Tankou moun ki san karaktè
Nan anbeli tout vye dechè
Nan rann tout malandren popilè
Nan anbrase tout atoufè.
Ducasse Alcin