Michel DeGraff reponn Lyonel Trouillot : Menm lè w gen « Zanno kay òfèv », ou toujou ka « Rayi chen, di dan l blan »

0
1959

Repons pou Lyonel Trouillot — yon repons an 5 kesyon

@MichelDeGraff@MITHaiti
Pwòf Lengwistik @MIT
Grenadye @MITHaiti
Akademisyen nan Akademi Kreyòl Ayisyen

Madi 15 novanm 2022 ((rezonodwes.com))–

1. Èske Lyonel Trouillot (L.T.) sonje masak ak kadejak ann Ayiti nan lane 2004 rive 2006 yo kont dè milye konpatriyòt nou yo ?_ Lè sa a, L.T. te chèf kabinè nan Ministère de la Culture et de la Communication Haïti nan gouvènman de fakto Boniface Alexandre / Gérard Latortue. Se gouvènman ilejitim sa a ki te akeyi MINUSTAH ann Ayiti e ki te mande Lafrans padon pou Prezidan Jean-Bertrand Aristide ki, an 2003, te mande Lafrans pou l remèt ranson yo te vòlè nan men Ayiti a (egal : US$ 21 bilyon). Sanble demann sa a se youn nan rezon ki te fè Lafrans, Etazini ak Kanada te patisipe nan kou d eta kont Aristide.

 « yon minis [Nesmy Manigat] solidè ak aksyon gouvènman li »

2. Lyonel Trouillot ekri : « yon minis [Nesmy Manigat] solidè ak aksyon gouvènman li ». Dapre lojik sa a, èske sa vle di li menm, Lyonel Trouillot, te solidè masak ansanm ak tout kalte vyolans kont dè milye Ayisyen — kadejak te ladan tou — sou kontwòl gouvènman de fakto Alexandre/Latortue sa a L.T. t ap sèvi a ?


3. Èske se bliye Lyonel Trouillot bliye masak ak kadejak 2004–2006 sa yo ?  Oswa èske se yon komisyon kolonyalis Ambassade de France en Haïti mande l fè kòm « Chevalier des Arts et des Lettres » — yon komisyon ki mande l monte sou chwal li pou l atake atik Michel DeGraff 14 oktòb 2022 nan New York Times ?


4. Kòm Lyonel Trouillot te travay nan Ministè Kilti ak Kominikasyon nan gouvènman de fakto Alexandre/Latortue sa a (2004–2006) e kòm L.T. se direktè literè nan Atelye Jedi Swa, an n mande ki konsèy, rekòmandasyon oswa kritik L.T. ka ofri MIT-Ayiti pou n amelyore travay n ap fè pou n ede nan tabli fondasyon solid pou lekòl tèt an wo  ann Ayiti —pou n ede nan mete peyi a tèt an wo ?  Petèt L.T. ava ofri rekòmandasyon konkrè konsènan aplikasyon Dekrè 30 mas 1982 a (Refòm Joseph C. Bernard).


5. Nan menm objektif sa a, èske Lyonel Trouillot ta ka pataje analiz li sou estrateji Pwòf Istoryen Pierre Buteau (an kopi nan imel la) ki te Minis Edikasyon (2004–2006) nan menm gouvènman de fakto Alexandre/Latortue sa a kote L.T. te Chèf Kabinè nan Ministè Kilti ?  Èske Pwòf Buteau, li menm tou, te solidè ak aksyon yon gouvènman ilejitim ki t ap maspinen pitit peyi a ?  An tou ka, m espere estrateji ak bilan P. Buteau kòm Minis Edikasyon 2004–2006 ka ede n konprann pi bon fason pou n ede tout pitit peyi a jwenn bon jan edikasyon  — edikasyon nan yon lang  tout ti moun yo konprann dapre Dekrè 30 mas 1982 a (Refòm Joseph C. Bernard). Petèt analiz bilan Pwòf Pierre Buteau kòm Minis Edikasyon an 2004–2006 (slogan : « Éducation pour tous ; tous pour l’éducation ») ava ede n amelyore travay n ap fè jounen jodi a nan dosye fondamantal sa a.

An final, nan analiz  pa m, atak Lyonel Trouillot sou atik mwen nan New York Times la ta sanble ak yon lòt konsekans gwojemoni ki fè sèten konpatriyòt pami plim e ank nou yo — kit se nan « ladwat », kit se nan « lagoch », kit se nan « dwat e goch » —  souvan ap chache kraze sa ki ka bon pou peyi a paske fòk yo defann ideyoloji ak enterè pa yo epi fòk yo jete bebe a pandan y ap jete dlo beny bebe.  Aksyon sa yo se pa pou enterè nasyon an, non.  

Enben, sou bò pa m, mwen rete kwè pwovèb kreyòl sa a gen sajès ladan :
« Rayi chen ; men, di dan l blanch »

An franse :
«  … il faut rompre avec le discours paresseux et réactionnaire qui veut que l’ensemble de la fonction publique soit corrompu — il y a eu sous tous les gouvernements des fonctionnaires honnêtes qui ne demandaient qu’à bien faire leur travail … » (Lyonel Trouillot nan _Le prix du Jean-Claudisme_ C3 Éditions, 2013, paj 14)
Ki donk, lè Chèf Kabinè Lyonel Trouillot ekri 

« yon minis solidè ak aksyon gouvènman li »

li kontredi pwòp tèt li pandan l ap akize pwòp tèt li tou.  Kontradiksyon sa yo sanble ak konsekans demagoji gwojemoni k ap chache make pwen pou enterè pèsonèl san okenn respè pou verite ak enterè nasyon an.  Nan lojik sa a, sanble  fòk nou ta 100% neglije lavni ti moun yo —sispann tout kalite inisyativ pou n amelyore lekòl yo — toutotan pati politik nou rayi a o pouvwa !

Nou menm nan MIT-Ayiti, se pou jenerasyon jodi ak jenerasyon demen n ap travay.  Se foumi k ava pote bon nouvèl rezilta yo ban nou.
Sila yo ki enterese ava jwenn referans sou done ki nan repons sa a (konsènan masak, kadejak, Alexandre/Latortue, lagoch, ladwat, dwat e goch, gwojemoni frankofòl, Refòm Joseph C. Bernard, MIT-Ayiti e latriye) ava gade afich sa a sou Facebook :
https://www.facebook.com/michel.degraff/posts/pfbid04L2K8sutJwYrwNCS9VEppW8qdETjvfdE3B34msfJKpiEVo5CX4Eh3MiQTiPA4Yaj


__________________________
@MichelDeGraff @MITHaiti
http://mit.edu/degraff
https://MIT-Ayiti.NET/
http://Haiti.MIT.edu/
https://MIT-Ayiti.NET/sa-n-ap-fe/

LEAVE A REPLY

Please enter your comment!
Please enter your name here

Ce site utilise Akismet pour réduire les indésirables. En savoir plus sur comment les données de vos commentaires sont utilisées.