NÒT POU LAPRÈS/ No-001
Kolektif òganizasyon Rejyonal Siyatè Akò Montana (KORESA MONTANA)
Lendi 19 septembre 2022 ((rezonodwes.com))–
Kolektif òganizasyon Rejyonal Siyatè Akò Montana a (KORESA MONTANA) salye kouraj ak detèminasyon pèp ayisyen nan batay pou reklame byennèt kolektif ak yon lòt Leta ki chita sou Jistis sosyal epi mande demisyon San kondisyon Gouvènman defakto Ariel Henry ap dirije ki pap regle anyen, sinon agrave sitiyasyon sosyoekonomik ak politik peyi a chak jou.
Kolektif la deplore epi kondane zak asasinay ak maspinay la Polis fè sou plizyè manm nan popilasyon an kap revandike dwa pou lavi yo chanje fas a yon gouvènman kriminèl ki deklare popilasyon an lagè nan tabli ensekirite, enstore la mizè ak koripsyon, monte gaz 17 wotè.
Kolektif la ankouraje popilasyon an pou kontinye kanpe fas ak pouvwa kriminèl PHTK twazèm vèsyon ak alye l yo jiskaske nou chanje Leta kriminèl sa a kap depafini peyi a epi toufe popilasyon an o pwofi yon ti gwoup rapas aganman.
Menm jan popilasyon an reklame l, Kolektif la kwè se sèl yon solisyon ayisyèn ki ka rezoud kriz peyi a ap viv la. Se pou sa, kolektif la mande sendika kò gwoup la, fè yon ti kanpe ak divèsyon konplis l ap fè yo. Lit pèp Ayisyen an pap negwosye pou jwèt marèl!
Konsa, kolektif la mande Biwo Swivi Akò Montana a prese prese pou jwenn Yon solisyon definitif ansanm avèk rès aktè yo nan peyi a pou tabli Tranzisyon koupe fache a nan enterè pèp ayisyen an. Pandan kolektif la ap egzije pou eleman fondalnatal nan Akò Montana a respekte kòm sa dwa : yon egzekitif ak 2 tèt, Ògan Kontwòl Tranzisyon an, remanbreman ak asenisman administrasyon piblik la, sekirite, amelyorasyon imedya kondisyon lavi popilasyon an, reyalizasyon konferans nasyonal granmoun, odit sistèm elektoral la pou 12 dènye ane sa yo ak reyalizasyon bon eleksyon pou pèmèt peyi a gen nan tèt li yon gouvènman eli pou mennen l sou wout devlopman, eta de dwa ak pwogrè.
Kolektif la mande popilasyon an pou l rete veyatif, pou n pa pran nan pakapala gran manjè. Pandan n ap kontinye batay pou fè pouvwa kriminèl PHTK, SDP, Fusion, Inite elatriye kite pouvwa a. Fwa sa a se solisyon ayisyèn lan k ap mete Tranzisyon koupe fache ki pap mare nan pye tab kò gwoup ni pou vin fè Twit ni bay dikte pou pase gouvènman Ayisyen lòd.
Pou fini, kolektif la di popilasyon an, li pa gen dwa batay a mwatye, menm jan Prezidan Paul Kagame di l, pou l repete Jean Jacques Dessalines : si nou vle vrèman soti nan mizè , ensekirite, kidnapping ak movèz gouvènans, se batay pou kapote pouvwa mafya a. Nan ka kontrè, lap tounen an fòs pou fin touye nou, deja depi nan monte pri gaz jiska plis pase 100%, Ariel gentan di nou se fen nou li vin fè.
Aba Ariel ak gouvènman kriminèl li a, Aba tout pòt pawòl pèpè ak solisyon enpòte!
Viv Yon solisyon ayisyèn ant ayisyen pou rezoud kriz la !
Viv Yon Tranzisyon koupe fache!
Moun ki siyen pou KORESAMONTANA :
Rejean FONTAINE, Fowòm Sitwayen nan Sid (FÒSSID) Depatman Sid
Mackendy JUSTE, Pati Liberatè Ayisyen (PLA) Depatman Sid
Ginot ROMAIN, CERREJEN Depatman Nip
Profène JEUDI, Mouvement des Paysans Progressistes Baradères (MPPB) Depatman Nip
Jean-Luc SEMERZIER, Fédération Nationale des Organisations Paysannes FENAOP, Grandans
Mackenson JEAN, Mouvement Paysan Grand’Anse (MPGA) Depatman Grandans Antimé Bien Aimé, Grand’Anse Avant Tout Depatman Grandans Kerby JOSEPH, Rezo Òganizasyon Nòdwès Depatman Nodwès
Kerly DUBREIS, Asosiyasyon Jèn pou Liberasyon Lakou Lakay(AJ3L) Depatman Nodwès Raynold BRENORD, Konbit Peyizan Ayisyen (KPA)/ Branch Nòdès Depatman Nodès
Chantale ALIZE, ALTÈNATIV Sitwayèn pou yon Lòt Ayiti (ASLA) Depatman Nò
Nicolas PIERRE-LOUIS, Platfòm Rezistans Peyizan Latibonit (PREPLA) Depatman Atibonit