Nòt pou laprès
Madi 26 oktòb 2021 an, yon delegasyon Biwo Suivi Akò 30 Dawout 2021 (BSA) reponn envitasyon Doktè Ariel Henry te fè l lan yon lèt ki pote dat 25 oktòb 2021.
Konvèsasyon an te dewoule plis sou kondisyon lavi Pèp Ayisyen lan moman kriz politik la pran yon koub ensekirite jeneralize sitou lan depatman Lwès la men tou kote tout rès peyi a lòk, kit se gaz ki pa ka distribiye, kit se bandi ak gwo zam ki pran kontwòl zòn estratejik yo. Kote tout enstitisyon ki gen responsablite sekirite Leta parèt an difikilte pou konbat ensekirite sa a.
Patisipan nan rankont aprèmidi 26 oktòb 2021 rekonèt pou debloke konjonkti politik la, pèmèt aktivite ekonomik yo reprann nòmalman, pou timoun rekòmanse al lekòl, pou popilasyon an kontinye mennen batay pou amelyore kondisyon lavi l, gen ijans yon bon plan pou kwape ensekirite politik sa. Delegasyon yo rekonèt pou rive jwenn solisyon sa a, fòk dirijan yo jwenn konfyans popilasyon an. Dr Henry ensiste sou priyorite li ki se òganize eleksyon trè vit, regle kesyon konstitisyon an pou enstitisyon yo rekanpe.
Delegasyon BSA a fè konprann, nan kriz Leta sa a, li fondamantal pou pouvwa politik tranzisyon jwenn yon lejitimite sosyete a dwe ba li nan yon demach konsansis laj lan mitan fòs òganize pèp nasyon an. Konsa lap kontinye mete anplas Konsey Nasyonal Tranzisyon, Ogàn Kontwòl Tranzisyon pou rive monte Gouvènman Tranzisyon ripti a.
Delege BSA yo, fè konprann se de (2) pwojè diferan lan kijan yon tranzisyon ta dwe fasilite yon retou anba lòd konstitisyon 87 ak legalite enstitisyon politik yo.
Doktè Ariel Henry pat prezante okenn pwopozisyon konkrè pou yon dyalòg politik konsekan ant 2 vizyon yo lan demach estratejik yo sou tranzisyon an. Nou dakò pou kontinye chita pale men delegasyon BSA, mande Dr Ariel Henry pou l fè yon pwopozisyon konkrè. Doktè Henry engaje l pou fè sa rapidman.
Volonte pou anpeche popilasyon toufe anba vyolans ensekirite lap sibi a eksprime klèman pa tou de (2) delegasyon yo. Men kisa reskonsab Leta ki la yo pral fè pou popilasyon an pran yon souf pa rive soti nan dyalòg politik sa a.
Biwo Swivi Akò 30 dawout ap mennen dyalòg politik menm jan li fè l deja e kontinye fè l avèk reprezantan PEN ak alye, MTV ak plizyè lòt aktè.
Koòdinasyon Biwo Swivi a
Pou otantifikasyon
Marie-Christine Stephenson
Magali Comeau Denis