Wout Vodrèy m kwaze bab pou bab yon zanj
Sou latè pou pechè latè
Lesyèl pou zanj vòltije
Me sou wout Vodrèy m kwaze bab pou bab yon zanj
Trèz lane anvan
M te wè w nan rèv
Anyen pa chanje
Rèv la tèt koupe je klè Grandi w grandi w ase
Matirite w debòde
Se menm zanj lan
Vodrèy mete m bab pou bab ak ou
Je nan je
Men nan men
Tèt kole
Pye nan pye
Nou 2 fè youn
Kò sou kò
Jouk lannuit pati kite nuit lan
Nan yon kontanplasyon demezire
Senkèdimaten rive
Solèy la fè kazi lè l tande vwa nou
Lari pa t tande vwa w
Ou pa t tande vwa lari tou
Se pye bwa yo sèlman ki te okouran
Zanj tankou w m kwaze Vodrèy
Se yon egzanp vivan pou pwòpte vil Okap si y ap kopye bote w
Fòm kòw pa sozi wout ki mennen Ekolojik ni Satama
Vila Kana kriye sou longè foli nou anba dra a
Tanpri prete tout vil la mezi bèlte anba tivant ou
Pou l ka rale moso lafrèch cheri
Vodrèy m kwaze bab pou bab yon zanj tankou w
Sa gen 13 lane m te wè w nan rèv
Se fout bon pou mwen
Ou wouze m ou benyen m latètopye
Lodè kò w tache sou mwen kou lodè jasmen lanjelis
Fè foto w tanpri enstale devan vètyè
Pou vil la kopye bote w tanpri cheri
Wi Vodrèy ou bon pou pri a.
Jamesky Jeanty, Rèldouvanjou.
7 septanm 2025, 8 è 30 nan aswè.