REBHA, 28 Novanm 2024
A: Prezidan Repiblik la, Premye Minis la, ak tout otorite ki responsab nan Leta Ayisyen an
Nou menm, Rebati Hayti (REBHA), avèk yon kè lou, adrese nòt sa a pou fè w konnen enkyetid nou fas ak sitiyasyon trajik pèp Ayisyen an ap sibi chak jou. Nou remake ak anpil doulè ke mank lidèchip efikas ak angajman solid nan tèt Leta a ap kite peyi a plonje nan yon eta kote pèp la oblije viv nan kondisyon ki enjis e endiyan pou yon nasyon ki toujou reklame tèt li kòm yon pèp « lib e endepandan. »
Pandan ke kay moun yo ap boule, fanmi yo ap gaye, ak sitwayen yo ap viv nan lapèrèz anba men bandi san gouvènay, nou remake Leta pa reyisi pran mezi nesesè pou retabli sekirite epi pèmèt moun retounen lakay yo. Olye w mete sekirite ak estabilite nan sant priyorite w yo, nou konstate ak wont ke w ap enplike nan aplikasyon plan enperyalis ki pa sèvi pèp la, men pito ranfòse depandans ak feblès Ayiti devan lòt nasyon.
Li vrèman tris e revoltan pou wè jan sitiyasyon moun ki deplase yo vin pi grav chak jou. Pèp sa a, ki deja ap soufri anba mizè, pa menm gen aksè a bezwen debaz tankou twalèt, manje, dlo, ak sèvis sante. Yon sitiyasyon konsa pa ta dwe rive nan yon peyi ki lib depi plis pase de syèk.
Nou mande :
1. Retablisman Imedya Sekirite: Se premye devwa Leta pou garanti sekirite tout sitwayen li yo, san distenksyon.
2. Reabilitasyon Fanmi ki Deplase yo: Pran mezi klè pou moun sa yo retounen lakay yo san danje epi rekanpe sou pye yo.
3. Respekte Diyite Pèp la: Sispann pran mezi ki fè peyi a vin plis depandan sou enstitisyon entènasyonal yo, epi pito fè tout sa ki nesesè pou ranfòse souverènte Ayiti.
4. Devlopman Plan Pèmanan pou Edikasyon ak Sante Piblik: Se pa yon favè men yon obligasyon Leta pou l mete aksan sou aksè a sèvis piblik pou tout Ayisyen.
Nou repete kesyon sa a pou ou, chè dirijan: Eske Ayiti pa yon peyi lib e endepandan? Si li lib, Leta dwe fè tout sa ki nesesè pou pèp Ayisyen an viv ak diyite. Sinon, pou ki sa nou goumen pou endepandans sa a?
Nou menm nan REBHA, n ap kontinye mobilize kont tout fòm enjistis epi kondane tout move pratik k ap sakrifye byennèt pèp Ayisyen an. Nou kwè ke Ayiti ka leve tèt li ankò, men sa mande yon vizyon klè ak yon aksyon imedyat pou chanje direksyon sa a.
Nou tann yon repons ki montre ke Leta a prè pou fè sa k nesesè pou retabli fyète ak diyite peyi nou an.
Pou pèp la, pou Ayiti!
Rebati Hayti (REBHA )
Daniel Alexis
Komite Exekitif, REBHA