Eske Dr Conille ap pran yon pòtfèy ministeryèl pou’l pa fè menm erè 2011 lan ankò?
Nan yon twit ki parèt mèkredi maten bonè bonè sou kont pèsonèl X li (Tweeter), Dr Garry Conille fè premye reaksyon’l. Li remèsye CPT ou KPT a pou chwa’l yo fè – (sou 68 kandida) – pou dirije pwochen gouvènman an kap vinn ranplase « ekip enkonpetan ak pouryanis ak kowonpi« , selon anpil sitwayen, ke Dr Ariel Henry ap dirije jouk jodi-a san l pa bay pyès rezilta.
« Mwen santi m onore anpil dèske Konsèy Prezidansyèl la chwazi mwen kòm nouvo Premye Minis Ayiti« , se sa mouche Conille ki nan la kontantman ekri, e li « pwofite di mèsi anpil a tout òganizasyon nan sosyete sivil la, pati politik yo, ak manm dyaspora a ki pwopoze non mwen pami lòt kandida nan pwosesis la« .
Pou fini ansyen PM nan kòmansman gouvènman Tèt kale 1, bandi legal Michel Martelly ak Laurent Lamothe ki « inisye peyi a nan la twoublay ak òganize gang epi kraze atè plat tout lajan Petro Caribe a« , selon plizè rapò Kou dè Kont ak ONU, « ansanm, nou pral travay pou yon demen miyò pou tout pitit nasyon nou an ».
Nap souliye ke CPT a ki te gentan fè chwa yon lòt PM nan mèkredi te oblije fè bak sou desizyon ti koulout lè yo rann kont finalman ke « valèt pa mèt » e ke men ki bay pouvwa a ka retire’l ankò si w wap fè wòklò.