Tristès
se son lòlòj
ki souflete m douvanjou
pou leve m
nan dòmi.
Soufrans
se pen kotidyen
ki koule nan tout trip
ak tout venn
ki nan kòm.
Trayizon
se zami m,
se fanmi m
ki avè m toulejou
sou menm atèmiyò.
Rayisans
se dra blan
ki sou tèt landòmi
pou m`kouri
gwo lannwit.
Dezespwa
se lonbray
sou bwa kokolo tèt mwen
tankou karanklou
k ap paweze
nan dengonn ti poulèt.
Imilyasyon
Se tas kafecho
ki boule m jouk nan mwèl
Pou dlo
koule nan zye m.
Grèg lavi m chaje twou,
pou flenm
fofile tout boulin,
rive jouk nan gòj.
Siwomyèl tounen goyin
pou fann fwa m
san konprann
Kout kiyè m tounen pikan
pou
lalwèt mwen
dechire pakanpak
jouk nan lenfini…
Dan Yoo