Pòtoprens, 07 me 2023
Konbit Oganizasyon Politik, Sendikal ak Popilè yo
Pozisyon KONBIT la sou sitiyasyon malouk k ap brase bil peyi a patikilyèman sou mouvman pwotestasyon popilè BWA KALE, Mobizasyon anseyan yo ak ouvriye nan faktori yo
Konbit Oganizasyon Politik, Sendikal ak Popilè yo, ap suiv ak anpil atansyon jistis popilè a ki pote non mouvman bwa kale a k ap deplòtonnen nan kat kwen peyi a. Mouvman sa a rive nan yon kontèks kote :
- Sitiyasyon grangou ak mizè ap taye banda toupatou nan peyi a
- Gang ak sapat k ap travay men nan men ak gang ak kravat nan enterè kriminèl Kògwoup ansanm ak rejim kite kreye yo a kont enterè peyi nou ap simen dèy toupatou nan peyi a anba je konplis pouvwa anplas la ak aktè entènasyonal yo
- Rate gaz pwograme ap fè popilasyon an monte lesyèl pa do, pri transpò ak pri machandiz monte 17 wotè
- Konpayi telefòn yo (Digicel ak Natcom) ap koupe kou popilasyon an ak pri sèvis yo ki kontinye monte san gade dèyè
- Boujwazi a atravè labank yo, kidnape dola kliyan yo depoze nan bank yo
- Anseyan yo leve kanpe depi 17 avril pase pou fè tande vwa yo, elèv yo kontinye leve kanpe ansanm ak anseyan yo. Men jiskaprezan olye minis defakto Nesmy Manigat chita negosye jan sendika anseyan ekzije sa, li prefere ap fè jwèt dilatwa ak divèsyon pou tante kraze mobilzasyon sa a k ap deplòtonnen nan tout peyi a. Kidonk douvan atitid iresponsab sila a anseyan yo oblije nan katryèm semèn mobilizaksyon an lanse yon mouvman koukouwouj dèyè dirijan yo epi mande tout aktè nan tout sektè potekole nan operasyon KOUKOUWOUJ la yon mannyè pou rive jwenn bonjan satisfaksyon pou tout revandikasyon jis ak lejitim sila yo;
- Ouvriye yo leve kanpe pou denonse move kondisyon travay ak move kondisyon lavi nan izin yo kote yap ekzije yon salè minimòm kòrek ak lòt avantaj sosyal ki ka pèmèt yo viv nòmalman ak fanmi yo
KONBIT la pwofite okazyon sa a pou li voye yon gwo kout Ayibobo pou popilasyon an ki leve kanpe kont vyolans gang ak sapat yo nan mouvman bwa kale a. KONBIT la kore ak tout fòs li, mobilizasyon anseyan yo k ap ranfòse nan moman sa a atravè operasyon KOUKOUWOUJ la. KONBIT la kore mobilizasyon ouvriye yo lanse pou 8-9 ak 10 me semèn sa a. Pou tout rezon sa yo, KONBIT la mande :
- Pou popilasyon an kontinye ak mouvman bwa kale kont tout gwoup gang yo pandan n ap mete plis disiplin ladan pou inosan pa peye pou koupab. Bwa kale pou tout mafya ak enstitisyon k ap koupe kou pèp la
- Demisyon tout CSPN nan. Ni Ariel Henry, ni Frantz Elbe ki se PDG konpayi « Sécurité Plus S.A» ki montre yo se alye gang yo, yo pa gen ni volonte ni kapasite pou rezoud pwoblèm sekirite a
- Pou popilasyon an nan kat kwen peyi a ak nan dyaspora a leve kanpe pou pouse do tout mafya lokal ak entènasyonal k ap konplote pou kenbe pèp la nan sitiyasyon lanfè yo mete l la.
Pou KONBIT :
Guy NUMA Patrick JOSEPH
Jean Paul BASTIEN