15 fevriye 2023, se yon dat enpòtan pou tout manm Sosyet Koukouy Dèlma. Se nan dat sa branch Sosyete Koukouy Dèlma jwenn kat batèm li. Seremoni lansman branch sila te fèt nan Bazilik 33, Dèlma. Jean Mapou, sèl grenn Fondatè Mouvman Kreyòl Ayisyen (1965) ki rete vivan, te fè yon deklarasyon pou make okazyon an. Se yon plezi pou nou pataje deklarasyon sa ak ou.
Deklarasyon Jan Mapou pou salouwe KOUKOUY DÈLMA
Gason vanyan, Fanm vanyan
Manm Koukouy Ayiti-Dèlma
Mwen salwe nou ak tout fòs kouraj mwen!
Jodi a 15 fevriye 2023 s on gran jou
S on jou istorik pou jenès la an Ayiti.
Apre 57 lane, Sosyete Koukouy, “Potomitan Kilti Lakay” replante nan kè vil Pòtoprens kote li te kreye 18 Desanm 1965.
Nan memwa Fondatè yo ki deja fè lareverans, Henri-Claude Daniel (Jan Tanbou), Dr Ernst Mirville (Pye Banbou), Marie Lucie Bayas (Idalina)… Mwen Jan Mapou, mwen bat bravo lakontantman pou nou. Mwen remèsye powèt-ekriven, Jean-Baptiste Anivence ak Iléus Papillon, 2 ewo venndegede nan literati natif-natal la. Mwen Jan Mapou fondatè ki toujou vivan ak nou, nan batay lang ak kilti pèp ayisyen an ak tout lòt gwoup koukouy yo, Boston, Kanada, Konektikèt, Atlanta, Miami, Chikago, United Arabs Emigrates, Ayiti-Santo, Kamaguèy- Kiba… Nou met Chapoba!
Mwen mande nou, pou nou travay ak kouray, ak Pèseverans. Wout la long, chaje ak wòch galèt, chaje ak pikan-kwannan. Se ansanm-ansanm ak anpil pasyans, devouman ak konstans, n a rive plante banyè laviktwa pou lang ak kilti Kreyòl la pou yon Ayiti pi bèl, pi fre, pi bòzò sou kat mondyal la.
Nan non Biwo Santral Sosyete Koukouy, nou swete tout nouvo kouzen/kouzin ki jounen jodi a deside pran larelèv nan Sosyete Koukouy Dèlma… Atyaba, bonvini nan fanmiy Mouvman Kreyòl Ayisyen an. Desten peyi a, avni lang ak kilti peyi a chita nan de plan men nou. Ayabonmbe!
Jan Mapou – Prezidan Fondatè
15 Fevriye 2023
Miami
