Obsèvatwa Pou Egalite (OPE) Tel. +50936644809
# 20, Ri, Tousen Louveti, Gwo Gabyon, Okay/Ayiti
Okay, 2 fevriye 2023
Konferans Pou Laprès
Tèm: Non a represyon viv libète lapawòl.
Obsèvatwa Pou Egalite (O P E) ak Konbit Aksyon Popilè Sid (KPAS) Kondane tout fòm menas ak entimidasyon otorite nan sid yo, tankou komisè gouvènman Okay Ronald RICHEMOND ak kèk endividi ki anti dwa moun ap fè sou defansè dwa moun yo pi presizeman sou defansè Jean Claudy Aristil direktè ekzekitif O P E, sou rezo sosyal yo ak nan lari nan mwa pase yo.
Anpil nan entimidasyon sa yo rive akoz kèk defansè dwa moun leve vwa yo pou mande arestasyon ak jijman tout moun, tout Otorite klamè piblik lonje dwèt sou yo kòm sispèk nan anlèvman ak asasinay direktè dopinyon THESSE Gary kote sa gen anviwon 3 mwa depi krim sa fèt la. Komisè gouvènman Okay la Ronald RICHEMOND ak Direktè Polis Nasyonal Sid la Daniel COMPÈRE se prensipal Otorite popilasyon Sid la site nan zak asasinay sal sa.
Konsa n ap denonse Otorite yo k ap eseye kreye de fo kont sou rezo sosyal, arete, fѐmen nan prizon depi plis pase you mwa jounalis Hypolite Guerland k ap akonpaye paran THESSE nan kad pou jwenn jistis. Dirijan yo fѐ sa avèk entansyon pou lage fado asasinay la sou defansè dwa moun k ap mande pou limyè fèt sou krim tèt chaje sa. Otorite yo ap kreye divèsyon pou twouble vijilans pèp Sid la sou vrѐ asasen yo.
Lòt pwen n ap soulve, se konsènan asasinay 6 polisye ki fèt semenn pase a nan Latibonit. Nou kondane zak sa, answit nou mande pou otorite yo arete ak jije tout otè, tout konplis zak sa yo.
Sou menm baz sa, mouvman kѐk polisye ap eseye fè pou anpeche mòd krim sa yo kontinye fèt nan sosyete a, li enpòtan pou popilasyon an pwofite sa, nan sousi pou li kontinye mennen batay kont ensekirite, eksplwatasyon, Okipasyon, lavi chè l ap mennen depi byen lontan an.
Aprè tout analiz sitiyasyon yo, nou mande pou Otorite yo, tout endividi mal entansyone yo pou sispann tout fòm vyolans y ap fè sou defansè dwa moun yo nan depatman Sid/Ayiti, jan konstitisyon 1987 Ayiti a ak Deklarasyon Inivèsèl Dwa Moun egzije sa. Nou mande pou sosyete a kanpe ak defansè dwa moun yo k ap batay kont enpinite, pou respè dwa moun, pou yo ka kontinye fè travay sa ale pi lwen. Wѐ pa wѐ fòk kriminѐl ki asasinen THESSE Gary yo jije.
Frape anwo pou n rive nan Byennèt ak libète. Aba kidnapin, aba enpinite, viv lajistis san fòs kote.
Jean Claudy Aristil pou O P E
Jamesnor Feuillé pou KAPAS
