Zizani
Toutouni
Je pete
Tèt pete
Vant tòde
Zo brize
Nan bouch zannimo
Ki pa konn dodo
Nan tann Jezi
K ap vini
San bri
San kont
Nan zizani
Ki mete n toutouni
Fè nou parèt lèd
Pirèd
Nan mitan
Yon bann
Mandyan
Sou chè
Legliz malfektè
Legliz fèzè
Legliz gwo mimi
Legliz malfini
Ayibobo
Pou tout je ki gen dlo
Paske yo refize dodo
Sou nat bondyebon
Anba tonèl lawon
Nan lawon dwategòch sa a
Kiyès ki pwan gwo bout pataswèl sa a
Anpil mouton
Kap pede di amèn tonton
Nan ranpli pòch malandren
Sòt pase penyen
Nan joure diva payen
Sendenden
Marengwen
Sangwen
Telman fè tenten
Li tounen bouden
Nan zafè pa m pi bon kite sa a
Yo pa janm sispann rablabla
Kidonk giyon donnen
Sou yo tankou larim nan nen
Zotobre
Manje
Fidèl kreve
Bouda chire
Nan zafè lalin ak solèy
Tout moun pa gen somèy
Yo pito la ap tann lawouze
Tankou mannwèl Leta la woze
Apa li papa
Bat dada
Moun fou
W a jwenn lanmou
Timoun fidèl yo
Se senkant kòb dlo
Ak degouden
Pou pastè manyen
Kòm yoyo
Nan di
Wi Pas pasi
Wi Pas pala
Payas
Soulye boyo
Ou p ap sis
De sis
Lajan kèt
Al nan malèt
San w pa janm travay
W ap fimen pay
Fè bèl kay
Ak lajan fidèl
Ki san modèl
K ap bourike
Devan pòt payen
Pou pote lajan senyen
Pou al panpennen
Wi sanwont
Eskamòtè
Vòlè
Radòtè
Grenn pwomennen
Yon jou kon jodi an
Nou gen pou n taye banda pa n
San dan douvan.
NY. 7 dawou 2024
ESA.