Madi premye novanm 2022 ((rezonodwes.com))–
Lansman twazyèm edisyon »Festival lide/Ench ap li » rive fèt nan lokazyon jounen entènasyonal lang ak kilti kreyòl jou ki te vandredi 28 oktòb 2022 a anndan cite Chalmay Peral. Edisyon sa a ap dewoule anba tèm : « Ijans ki genyen pou n panse Leta nan peyi nou Ayiti ». Pou twazyèm edisyon Festival la, Chalmay Peral p ap senpman alonè men l ap nan sant deba yo sòti nan fòmasyon rive nan divètisman yo.
Daprè responsab festival la, yon kokennchenn koudjay kiltirèl ap gen pou dewoule sòti 28 oktòb la pou bout dimanch 4 desanm k ap vini an. Anpil aktivite tankou konferans, resital, vant siyati, atelye lekti, ekriti, vizit touristik nan Basen Zim, espas entèpretasyon sou Chalmay Peralt, pou site senpman sa yo,
pral feraye andan tout vil Ench la.
Pandan gwo evenman sa, se ap okazyon pou f on ti koze sou pi ansyen katedral nan karayib la ak basen zim ki twouve yo nan vil Ench. Yon lòt bò festival la swete fè moun yo viv yon ansanm pratik kiltirèl tankou dans tradisyonèl, jwèt ak manje lokal nan lide pou valorize ansanm patrimwan kiltirèl ayisyen an.
N ap pwofite raple Festival lide/Ench ap li ki gen pou eslogan (Rezilta inyorans se betiz) ap pwofite f on gwo bat bouch sou gwo batay gwoup politik Kako t ap mennen pandan peryòd lokipasyon blan meriken (1915 -1939) nan lide pou met kèk pwen sou I ak lide k ap klewonnen depi kèk jou pou fè fòs etranje pile sòl papa Desalin nan ankò.
Bidler Nelson
bidlernelson@gmail.com
