KOMINIKE
«Reyaksyon Sektè Demokratik ak Popilè a (SDP) aprè deklarasyon Sekretè Jeneral Nasyon Zini an António GUTERRES, Anbasad Peyi Etazini nan Pòtoprens fè sou batay Pèp la ak pwovokasyon Dr. Ariel HENRY an.»
Pòtoprens, dimanch 18 septanm 2022 : Sektè Demokratik ak Popilè a (SDP) ap kondane ak tout fòs li deklarasyon enjerans arogan rasis Sekretè Jeneral Nasyon Zini António GUTERRES fè sou batay Pèp ayisyen an, ki tanmen depi 3 dènye semèn sa yo, kont : ensekite, grangou, lamizè, kriz gaz ak movèz gouvènans, epi depa imedya Premye Minis defakto a Ariel HENRY ki pa gen okenn lejitimite, lalwa pa rekonèt li e ki kòmanse fè anpil krim sou Pèp ayisyen an k ap mennen yon batay demokratik san zam.
SDP ap raple pou kominote entènasyonal la batay sa pran nesans nan nannan Pèp la, nan peyi andeyò, nan depatman yo (Sid, Grandans…), kote sa yo pa gen gang, batay sa se yon batay sitwayen.
Pèp la sèmante 7 fwa 77 fwa kou sa pap pase batay Pèp la p ap asosye ak gang se blan yo ak dirijan PHTK yo ki te plante gang nan peyi a, jodia se tout Pèp la ki nan lari kont Ariel. Nasyon Zini gen plis pase 30 lane l ap fè jwèt sa, SDP ap fè Sekretè Jeneral Nasyon Zini an sonje ke se Madan Lalime ak PHTK ki te ferede gang yo nan peyi a.
SDP konstate, depi kèk lane, Anbasad Peyi Etazini nan Pòtoprens pran plezi nan foure bouch li tout longè nan zafè peyi dAyiti san respè pou lwa peyi a ak etik kominote entènasyonal la dwe genyen pou Pèp ayisyen an, enjerans Peyi Etazini an vle fè n pase pou esklav yo. Douvan lemond antye, SDP ap di kominote entènasyonal la ke prezans Ariel HENRY reprezante yon menas pou lavi ak byen plis pase 12 milyon ayisyen.
Yon lòt kote, SDP flanke jete byen lwen mesaj ak nasyon an ke Ariel HENRY bay la. Deklarasyon sa lage lwil sou motè mobilizasyon an. Diskou Ariel la pa kanpe sou anyen. Olye Ariel tande revandikasyon Pèp la, li prefere kontinye ap provoke Pèp la. Ariel trete popilasyon k ap manifeste nan (Jakmèl, Ti Gwav, Jeremi, Okay, Okap, Gonayiv, Sen Mak, Pòtoprens, elatriye) yo de vòlè. Pèp ayisyen se yon gran Pèp, yon Pèp ki gen anpil kouraj, diyite ak fyète. SDP p ap janm dakò pou Ariel HENRY ap trete Peyizan yo, Chofè moto yo, Ti Machann yo, Profesyonèl yo, Ouvriye ak Ouvriyèz yo, Jenn fanm ak Jenn gazon ki dakò rete viv nan peyi a, Militan yo de vòlè.
Sektè Demokratik ak Popilè a ap mande popilasyon an, militan yo, kad ak dirijan SDP yo pou yo kontinye mobilize pasifikman men aktiv e responsab nan 10 depatman peyi a, nan tout baz yo, nan tout katye popilè yo jiskake nou jwenn depa Ariel HENRY. Bourik chaje pa kanpe ! Pèp la p ap pèdi tan pou mete Ariel atè tankou diktatè Jean Claude DUVALIER.
Pou fini, Sektè Demokratik ak Popilè a renouvle angajman l pou l kontinye batay pou byennèt ak souverènte Pèp ayisyen an. SDP ap mande, yon lòt fwa ankò, ak tout fòs viv nasyon an, moman rive tout bon vre pou n mete nou ansanm pou defini panorama «Ayiti Demen an». Pou n ka rive kwape enjerans, arogans e rasis kominote entènasyonal la.
SDP se Pèp la, Pèp la se SDP! Viv yon pouvwa popilè ak Pèp la e pou sèvi Pèp la! Pou Sektè Demokratik e Popilè a (SDP):
Ekonomis Nènel CASSY Ansyen Depite Ulrick ST-CYR,
Ansyen Senatè Repiblik dAyiti Jiris & Kominikatè Sosyal
Dirijan (SDP) Pòt Pawòl (SDP)
Ansyen Konsil Daril BALTAZAR
Pòt Pawòl Sektè Demokratik e Popilè a (SDP)