Senatè Benoit mete tout kakachat Jovenel deyò nan rankont ak misyon OEA

1
6973

DEKLARASYON SENATÈ STEVEN I. BENOÎT

Vandredi 11 juin 2021 ((rezonodwes.com))– Mwen remèsye ak tout kèm tout Manb delegasyon an ki dakò vin nan peyi a menm lè kondisyon yo difisil.

Sitiyasyon sekirite peyi a degrengole ak yon vitès okenn moun pat imajine, menm nan mwa ki sot pase la yo. Nan anpil katye kote gang yo ap fè lalwa, kote yo se sèl kòk chante, popilasyon an yo te blije kouri, di pye sam manje mwen pa ba w. Anpil se ak sandal nan pye rechany sou kò yo ye. Yo mache byen lwen san yo pa konnen kote yo pral chwe, kote yo pral ateri. Konsa tou, anpil ladan yo pèdi tout sa yo te genyen. Genyen Ki pèdi kay yo, lomès yo nan batay gang ak gang pou yo okipe plis tèritwa.

Se nan menm moman sa, pandemi kowonaviris la parèt ak tout fòs li nan peyi a kote Gouvènman an pat fè okenn preparasyon pou sa. Se sak eksplike anpil moun mouri, anpil lopital ak sant sante chaje kou legba. Li enpòtan pou n raple sa, nan mwa fevriye lane sa menm Mesye Jovenel Moïse te wè li enpòtan pou òganize kanaval nan Pòdpè ( premye vil nan depatman Nòdwès peyi a). SA nou dwe konnen, nan menm epòk sa otorite nan Trinidad ak nan peyi Brezil te pran desizyon anile kanaval lakay yo akòz gwo risk pandemi kowonaviris la.

Tout gwo Kè sote sa yo, tout gwo enkyetid sa yo makònen ak yon sitiyasyon ekonomik kap vin pi mal chak jou, kote goud la ap pran gwo pataswèl devan lajan meriken an, peyi a rive nan yon enflasyon 2 chif ak yon defisi nan bidjè Leta kap plonje finans piblik yo nan bafon san limit. Jovenel Moïse ap gaspiye lajan Leta nan yon bann politik piblik, yon bann aktivite san pye ni tèt. Konpòtman depanse lajan Leta san okenn limit, san okenn pwojè serye se depi nan zafè karavann chanjman. Yon Karavann chanjman ki se te yon yon kouvèti, yon dra pou li ak asosye l yo te ranmase plis lajan toujou.

Sa nou swete souliye devan delegasyon se Misye Jovenel Moïse pat prepare ditou ditou pou te vin prezidan, pou te vin dirije Ayiti. Prèske tout biznis misye te genyen echwe (dènye antrepriz misye a se te yon plan pou yo te pataje lajan -Fon Devlopman ak Endistri- ki gen ti non jwèt FDI moun ki te finanse kanpay li yo nan PHTK). 

Kote koze a grav anpil, kote pa gen pawòl ou moun kapab pwononse, misye Jovenel Moïse pa montre l genyen okenn yon ti lòsyè konsiderasyon pou popilasyon an. Li toujou ap plen moun ak manti, li toujou ap fè pwomès li pa kapab respekte, li toujou ap lonje dwèt Judas l, li toujou ap fè menas sou bizismann ki pa pote kole ak li. Menm jan tou, li pa janm sispann menase politisyen nan opozisyon an.

Misye Jovenel Moïse se yon moun ou pa fouti konprann, menm kote lap klewonnen lap batay kont “oligak” yo, li mete kanpe gwoup oligak pal ak yon ekip bizismann ki te finanse kanpay elektoral  manch long li an pou l rive kote l ye nan tèt peyi a. Yon kanpay elektoral ki te koute anpil lajan. Se premye fwa Ayisyen wè yon kanpay prezidansyèl ki koute pil ak pakèt lajan sa.

Manb misyon sa dwe gen nan tèt li, li dwe sonje se OEA ki te tabli yon metòd pou konte bilten yo nan eleksyon 2010 yo ki te chanje rezilta eleksyon yo nan peyi a. Kandida Sweet Micky ( yon chantè kap di betiz, fè grimas) te vin rive nan dezyèm tou kont Madan Manigat. Sou lòd Edmond Mulet(reprezantan Sekretè jeneral Nasyonzini nan epòk la) ekip teknik OEA te ede yo jwenn rezilta Sekretè deta meriken Hilary Clinton te swaf la, te vle a.

Konsa Pèp Ayisyen an genyen tout bon vre, yon gwo kochma, yon gou anmè, yon move souvni Òganizasyon ki rele OEA nan politik peyi a, nan dènye ane sa yo.*
Jodi a, plizyè milyon Ayisyen ap viv nan kondisyon moun pa dwe viv akòz Jovenel Moïse paske Jovenel Moïse tabli yon rejim ki koupe fache ak demokrasi, yon rejim diktati nan peyi a lè l pa janm òganize eleksyon nan moman yo te dwe òganize yo. Chwa sa se pou l te kapab gouvène ak Dekrè, dèyè do lakwa epi tou pou l te kite gang li yo layite kò yo anndan peyi a pou teworize popilasyon an.

OEA gen devwa pou defann prensip demokratik nan peyi dAyiti. Men sa pa dwe fèt nan ankouraje òganizasyon eleksyon ak yon baz done elektronik chaje ak foub ladan l, yon baz done ki pa enspire okenn konfyans, yon konsèy elektoral kote moun anndan l yo pa onèt, pa kredib, pa legal, pi klè Manb konsèy sa yo pa katolik, kote sistèm sekirite nasyonal ansanm ak sistèm jidisyè a atè plat nèt. Abse sou klou, gen 5 endividi ak kolaboratè yo nou pa idantifye kap travay sou yon nouvo Konstitisyon anti demokratik, tout anba men Jovenel Moïse, tout sou kontwòl total kapital misye. 

Si Jovenel Moise te mete menm enèji li montre la pou òganize Referandòm ilegal ak anti Konstitisyonèl li y’a, pou l te òganize eleksyon Konstitisyonèl  yo nan lane 2019, peyi a pa tap nan katyouboumbe sa, li pa tap konnen kriz politik san parèy sa.

Li te chwazi pa sèvi ak majorité li te genyen nan Palman an pou fè ratifye pwojè lwa elektoral la nan epòk sa. Jovenel Moïse di sou laplaspiblik li bay tout politisyen défi pou yo ta vin pran pouvwa sa nan men l ansanm ak asosye politik li yo. Se pa san rezon li lanse defi sa, se paske li konnen lap pare kò l, lap ranje kabann li lap asire l li genyen kontwòl pouvwa pou 5 lane ankò nan peyi a.

Se depi 2017 lè misye Jovenel Moïse te enstale nan tèt peyi a, li te gen plan lanmò l, plan machiavélique li nan tèt li. Kisa plan sa te ye? Plan sa se te fè Palman pa kapab travay tout bon vre, pou l te rive kote pou l gouvène ak dekrè pou pran tout avantaj pou li menm ak ekip li yo.

Tout demach sa yo genyen yon sèl objektif akouche yon prezidan ak yon gouvènman pou vin kase fèy kouvri sa, fèmen je sou tout vyolasyon Dwa moun, vyolasyon Konstitisyon, ak gwo zak dechèpiyay li menm Jovenel ak tout ekip li yo fè nan tout kès Leta. Nou pap bliye pil ak pakèt masak gang li yo fè sou Pèp la. Nap di nou prezidan pa janm okenn mesaj soulajman, okenn mesaj senpati bay viktim gang yo ak Paran yo.

Sweet Micky ak a premye minis li Laurent Lamothe se 2 prensipal moun ki dechèpiye pifò lajan Petwokaribe y’a. 2 misye sa yo vin rich anpil. Yo gen lajan moun dwe pran anpil tan pou konte. Kounye a e mouche Lamothe e mouche Sweet Micky chita sou ti chèz yo ap tann Konstitisyon ki fèt pou vòlè ak vòlè, ki pou vin pwoteje yo, kouvri yo kont tout ankèt pou dwèt long siperyè.

Pèp Ayisyen merite pou yo konprann li, pou yo respekte, pou tout lane li fè ap soufri anba men dirijan iresponsab, dirijan enkonsyan ak pou batay san pran souf li mennen pou kapab rive chanje lavi l, pou l kapab yon demen miyò. 

Ayiti bezwen yon plan estratejik pou asire devlopman l, pou òganize ekonomi l, pou òganize politik li ak pou òganize koze sosyal yo, yon mannyè pou ogmante PIB, pou pèmèt yon lòt distribisyon ak repatisyon richès ak resous nasyonal yo nan avantaj majorite popilasyon an.

Nou pa dwe gen okenn dout sou pwen sa, tout eleksyon bridsoukou pral louvri pòt bay plis magouyè, plis atoufè, plis kriminèl fè dappiyanp sou pouvwa a. Endividi ki pa gen lòt objektif ranmase lajan san gade dèyè, nan nenpòt kondisyon, Menm lè yo ta detwi ti rès anviwonman ak resous peyi a, se yo kap gen kontwòl eleksyon yo. Misyon sa pa fouti fè kòmsi li pa okouran, li pa gen enfòmasyon sou maswife Ayisyen ap monte depi kèk tan, sitou nan moman nou ye la.

Gang yo ap kwaze fè, ap twoke kòn yo nan tout zòn Ki viwonnen vil sa. Yo touye Polisye anndan komisarya yo. Bandi yo okipe yo kantite Pòs polis nan anpil zòn. Yo pati ak materyèl Lapolis la. Popilasyon an pa fouti mete lespwa l, li pa fouti mize ni sou gouvènman, ni sou Lapolis pou garanti sekirite l. Se yon sitiyasyon an ki tabli depi kèk mwa  deja. Depi 2 jen 2021 sitiyasyon ensekirite a rive nan pi wo nivo l.  Pèp la pa kapab tolere sa. Se tout bon, Pèp Ayisyen pa kapab aksepte l.

Èske nap fè tankou Jovenel Moïse gen kontwòl peyi a ou byen li gen yon Kè nan men pou popilasyon an? Map poze kesyon sa yo anfas konsyans nou chak ki prezan la?

Nou dwe fè Ayisyen reprann lespwa epi tou ede nou kenbe jèn yo anndan peyi a. Tout sak gen pou kite peyi a, tankou sak kite l deja dwe jwenn pwoteksyon gouvènman yo nan kad konvansyon ak trete sou dwa travayè ki kite peyi yo(migran) genyen. Men nan Ki kondisyon sa nou di la ap posib se lè nou rive reyalize eleksyon san fòs kote, eleksyon lib ak demokratik pou mete dirijan Ki pa dwèt long siperyè, dirijan ki renmen peyi l, dirijan Ki konnen byen travay li nan Pòs li eli a.

Pòtoprens, 8 jen 2021.-

1 COMMENT

  1. Vous parlez de Jovenel, vous oubliez l’assassin Michel Martelly qui a donne a ce petit jeran lakou les cles du pouvoir pour effacer les vols de Martelly. Ce petit ranyon de Jovenel a tout fait, il a cause la mort de centaines d’Haitien pour obeir aux ordres de ses predecesseurs. J’espere qu’il sera pris de rage apres cette aventure, et qu’il tranchera la tete de Michel Martelly de ses propres mains.

LEAVE A REPLY

Please enter your comment!
Please enter your name here

Ce site utilise Akismet pour réduire les indésirables. En savoir plus sur comment les données de vos commentaires sont utilisées.